A mund të importohet zhvillimi? Rasti i Modelit të Singaporit

Studentët - Universiteti "Barleti"

2026-01-20

Debati i radhës në stilin Karl Popper, nën drejtimin e profesor Rezart Prifti, u përqendrua në një pyetje sa provokuese aq edhe aktuale: a mund të shërbejë “Modeli i Singaporit” si një paradigmë e re për zhvillimin shqiptar?

Në këtë përballje argumentuese, dy ekipet lanë mënjanë opinionet subjektive dhe u fokusuan në fuqinë e provave, logjikës dhe analizës kritike. Nga njëra anë, u mbrojt vizioni i një shteti me efikasitet të lartë institucional, rritje të shpejtë ekonomike dhe planifikim afatgjatë strategjik, si elementë kyç të suksesit të Singaporit. Nga ana tjetër, u ngritën pyetje thelbësore që prekin vetë strukturën e shoqërisë sonë: a mund të justifikohet kufizimi i disa balancave demokratike në emër të pragmatizmit ekonomik? A ka kuptim një model zhvillimi që nuk përshtatet me realitetin kulturor, social dhe politik të Shqipërisë?

Debati u shndërrua në një hapësirë reflektimi mbi raportin mes zhvillimit dhe lirisë, eficiencës dhe demokracisë, duke nxitur studentët të analizojnë jo vetëm suksesin e një modeli, por edhe kufijtë dhe pasojat e tij.

Kjo përballje rikujtoi se e ardhmja nuk ndërtohet mbi ide tërheqëse në letër, por mbi guximin për t’i vënë ato në provë, për t’i sfiduar me argumente dhe për t’i përshtatur me realitetin që duam të ndërtojmë.